គណបក្សប្រជាជនពង្រីកសមាជិកភាពលើក្រុមយុវជនដែលមានគុណភាព
គណបក្សប្រជាជនកម្ពុជាកាន់អំណាចកំពុងរៀបចំសន្និបាតគណកម្មធិការ កណ្តាលរយៈពេល២ថ្ងៃនៅទីស្នាក់ការកណ្តាលរបស់ខ្លួនដើម្បីពិនិត្យ វាយតម្លៃសភាពការណ៍ទូទៅ និងការងារគណបក្ស។ ជាការងារបក្សក្នុងឆ្នាំ២០០៩ និងការលើកយុទ្ធសាស្ត្រសម្រាប់ឆ្នាំ២០១០ និង២០១១។ ក្រៅពីពិនិត្យការងារគណបក្ស ប្រធានបទសំខាន់ៗផ្សេងទៀតទាក់ទងនឹងសន្តិសុខសង្គម ក៏ត្រូវគណបក្សកាន់អំណាចមួយនេះលើកយកមកពិភាក្សាផងដែរ។
សន្និបាតគណកម្មាធិការកណ្តាលលើកទី៣៥អាណត្តិទី៥របស់គណបក្សប្រជាជនកម្ពុជាបានចាប់ផ្តើមប្រព្រឹត្តទៅ កាលពីព្រឹកថ្ងៃទី២១កក្កដានេះសម្រាប់រយៈពេល២ថ្ងៃ។ អ្នកចូលរួមដែលជាសមាជិកជាន់ខ្ពស់នោះ មានប្រហែល៩០០នាក់។
ប្រធានបទរួមនៃសន្និបាតនេះគឺ ការពិនិត្យសភាពការណ៍ទូទៅ និងការងាររបស់គណបក្សឆ្នាំ២០០៩ និងការលើកទិសដៅយុទ្ធសាស្ត្រសម្រាប់ឆ្នាំ២០១០និង២០១១។ ប៉ុន្តែបើតាមការបញ្ជាក់របស់លោកខៀវ កាញារីទ្ធដែលជាអ្នកនាំពាក្យរបស់គណបក្សប្រជាជនកម្ពុជា មានបញ្ហាមួយចំនួនដែលសន្និបាតត្រូវលើកយកមកពិភាក្សា។ ទាក់ទងនឹងកិច្ចការសង្គម សន្និបាតបានពិភាក្សាជារួមអំពីស្ថិរភាពនយោបាយ ស្ថេរភាពសេដ្ឋកិច្ច និងសង្គម។ ហើយបើនិយាយអំពីការងារគណបក្សវិញ លោកខៀវ កាញារីទ្ធបានអះអាងថា សន្និបាតបានពិភាក្សាអំពីការពង្រីកសមាជិករបស់គណបក្ស។
តាមពិតការពង្រីកចំនួនសមាជិកភាពរបស់គណបក្សនោះ វាជារឿងធម្មតាទេ ដែលគណបក្សណាក៏ធ្វើដូចគ្នា។ ប៉ុន្តែបើតាមការបញ្ជាក់របស់អ្នកនាំពាក្យរបស់គណបក្សប្រជាជនកម្ពុជាគឺថា ខ្លឹមសារនៃការពិភាក្សាលើការពង្រីកសមាជិកភាពរបស់បក្សនេះ គឺគណបក្សប្រជាជននឹងផ្តោតជាពិសេសទៅការស្រូបយកក្រុមយុវជន ពិសេសយុវនារីដោយដាក់អាទិភាពទៅលើគុណភាពរបស់យុវជន និងយុវនារីទាំងនោះ។ ចំនុចនេះ លោកនាយករដ្ឋមន្ត្រីហ៊ុន សែនក៏តែងតែបានលើកយកមកនិយាយជាសាធារណៈកន្លងមកដែរ។
លោកខៀវ កាញារីទ្ធក៏បានប្រាប់អោយដឹងថា សន្និបាតក៏លើកយកបញ្ហាព្រះវិហារ និងជម្លោះព្រំដែនជាមួយប្រទេសថៃមកពិភាក្សាផងដែរ។ លោកបញ្ជាក់ថា ទាក់ទងនឹងសំណុំរឿងប្រាសាទព្រះវិហារ សន្និបាតបានយល់ស្របរួមគ្នាថា រដ្ឋាភិបាលក្រុងបាងកកចង់បង្វែរភាពតានតឹងផ្នែកនយោបាយផ្ទៃក្នុងរបស់ខ្លួនមកជាបញ្ហាព្រំដែន។ ហើយថា បញ្ហានេះគឺរដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជានោះ ត្រូវតែប្រុងប្រយ័ត្ន និងចៀសវាងកុំអោយធ្លាក់ចូលក្នុងអន្ទាក់នេះ។
និយាយពីបញ្ហាប្រាសាទព្រះវិហារ លោកឧបនាយករដ្ឋមន្ត្រីសុខ អានបានដឹកនាំគណប្រតិភូកម្ពុជាដើម្បីចូលរួមក្នុងកិច្ចប្រជុំគណកម្មាការបេតិកភណ្ឌពិភពលោកនៅប្រទេសប្រស៊ីល។ ហើយសម្រាប់កិច្ចប្រជុំនោះ កម្ពុជានឹងបង្ហាញពីគម្រោង និងផែនការអភិរក្ស និងអភិវឌ្ឍតំបន់បេតិកភណ្ឌប្រាសាទព្រះវិហារនេះ។ គេជឿថា រដ្ឋាភិបាលថៃនឹងបញ្ជូនមន្ត្រីរបស់ខ្លួនដើម្បីព្យាយាមរារាំង រំខានកម្ពុជាទៀតនៅក្នុងកិច្ចប្រជុំនោះ៕
0 comments:
Post a Comment